مناديل “جين” الجاهزة لازالة المناكير

Date: 2011.06.01 | Category: TC of ur nails, غيره | Response: 17

اهلا بالجميع

اليوم عندي موضوع سريع و خفيف عن مناديل لازالة المناكير اسمها جين خالية من الاسيتون

نشوف الفيديو و نرجعلكم

في البداية هل فعلا لا تحتوي هذه المناديل على اسيتون؟؟…لما قريت المكونات طلع انها تحتوي على مادة شبيهة نوعا ما بالاسيتون

لان احد المكونات اسمه

methoxyisopropanol

و مادة البروبانول هذه هي مادة شبيهه بالاسيتون…فا اتوقع انها تحتوي ع الاسيتون و لكن بشكل مخفف او مركب..يعني مش مكون رئيسي

من مميزات استخدام هذه المناديل….

هم كاتبين انه يمكن استخدامه للاظافر التركيب..لكن شخصيا ما جربته فما اقدر احكم

هم كاتبين انه لا يحتوي ع الاسيتون…لكن انا عندي شك بسيط في ده الموضوع زي ما ذكرت فوق

هو اذا لاحظتوا من الفيديو انه فيه زيت..هو بلا شك الطف ع الظفر و الجلد اكتر من مزيل المناكير السائل العادي..لكن اوقات الزيت اللي في المنديل ما بيسهل عمليه الازاله كتير

بالاضافة الى كونه في علبه و المناديل نفسها محطوطة في اظرف منفصلة هذا يحمسك اكتر انك تشيليه معاك في السفر او في شنطة يدك بدون الخوف من انه يبقع الشنطه دام انه في اظرف محكمة الاغلاق مقارنة بالقوارير و كمان هو منديل منه فيه..فما حتحتاجي قطن..يعني هو بصراحة مفيد وقت السفر فقط

من مساوئ استخدام هذه المناديل…

له ريحة بالنسبه لي ما حبيتها

يزيل المناكير بطريقة انا اشوفها عادية جدا..حتى كمان اقل مما كنت اتوقع..انا بالنسبة لي القطن افضل..يعني ماهو مرة مريح في الاستخدام و لكن في النهاية بيؤدي الغرض

__________________

تقدروا تلاقوا المناديل هذه في سوبر ماركت الدانوب

سعرها 17 ريال

اسود بقليترز من ذي بودي شوب

Date: 2011.05.27 | Category: The Body Shop | Response: 14

اهلا بالجميع

اليوم جايبتلكم لون ما اتوقع كلنا نحطه او ممكن نحطه بس نادرا..هو اللون الاسود

قيد سبق و عرضت اللون الاسود من ماركة انجلوت…لكن اللون الاسود اللي معايا اليوم مختلف..لانه مش سادة

انا اول ما شفته  قلت يمكن ما يكون قد كده…لاني ما احب اللون الاسود على اظافري ..لكن ده اللون غير تماما..حبيته جدا خصوصا لما تشوفي حبات القليترز معبيه ظفرك

اسمه

Starry Night

رقمه

01

اول مرة اجرب فرشه مناكير ذي بودي شوب…هي مريحة نوعا ما..لكن لاحظت اطرافها مش متساويه تماما..اتمني انه يكون بس في المناكير اللي اخترته و انه باقي فرشهم سليمه

ملحوظة صغيرة…انا اشتريت اللون ده من فترة..فا في احتمال يا انكم تلاقوه او ما تلاقوه..سعر القارورة كان بين 35 – 45 مش فاكره بالظبط

ــــــــــــــــــ

فروع ذي بودي شوب منتشرة  في جدة  بس اللي افتكرهم..

مركز دانيا

لو مول

حراء افينيو

سوق حراء

فرنش مناكير – الطريقة العادية

Date: 2011.03.20 | Category: O.P.I مناكير | Response: 9

اهلا بالجميع

استكمالا لموضوع طريقة عمل الفرنش مناكير السابقة

اليوم حشرحلكم كيفية عمل الفرنش مناكير بس بالطريقة العادية او التقليدية المعروفة

نتابع الفيديو و نكمل كلام بعدين

تقدري تحطي اي درجة لون تكون قريبة من الزهري اللي حطيته و يستحسن درجة اخف او الوان لحمية..او تكتفي باللون الشفاف عشان يبان طبيعي اكتر.

هذه الالوان تستخدم في الفرنش مناكير من او بي اي

ما يحتاج تنتظري كتير عشان طبقة اللون الزهري تنشف زي الطريقة اللي كتبتها في الموضوع السابق..ممكن تنتظري خمسة دقايق و بعدين ابدأي ارسمي الخط الابيض

بالنسبة لرسم حدود الخط الابيض..اذا حطيتي لون خفيف او سبتيه ع الشفاف حيكون سهل عليكي تشوفي حدود طرف ظفرك الابيض عشان ترسمي عليه مظبوط

اذا ما فيكي تمسحي اللون الابيض اللي بيجي ع الجلد لما ترسمي الخط يسير ممكن تحطي لصاق حولين ظفرك و بعد كده بس اللي عليكي انك تشيلي اللصق و خلاص

بالنسبة للحل اللي ذكرته في الفيديو في حالة اللون اتخبص..الملاحظة اللي ابغي اضيفها هي انه لما تسوي الطريقة سويها مرة بشويش عشان لا تشيلي اللون بالغلط

نصيحة اخيره..لما ترسمي الخط الابيض خلي ظفرك مستقيم عشان ترسمي علي حدود طرف ظفرك مظبوط…و تحتاجي النصيحة دي اكتر لما تستخدمي لون غامق زي اللي استخدمته لانه بيمنع انك تشوفي حدود طرف ظفرك..فا ممكن ترسمي الخط مايل.

اذا لاحظتوا اظافري في الفيديو اطول من اللي في الصور.. و هذا لانه الفيديو ده عملته من شهور..و التصوير كان اليوم..فطبعا حتلاقوا فرق.. و انا احبذ الفرنش مناكير ع الاظافر الطويلة اكتر..او انك لما ترسمي علي اظافر قصيره نحفي الخط الابيض عشان يعطي الظفر القصير طول

مناكير او بي اي تلاقوه في محلات نزيه- دوار الفلك او مركز دانيا

المناكير الابيض اللي ريشته نحيفة كتبت عنه موضوع هنا

المناكير الابيض اللي ما استخدمته من سيفورا – التحليه سنتر – الاندلس مول و فروع تانيه كتير

ــــــــــــــــ

ايش رأيكم..هذه الطريقة اسهل واللا اللي قبلها اللي باستخدام لصقة سينسي؟؟…احب اسمع آراكم

اتمنى اي احد ينقل معلومة او صورة من عندي في مدونته انه يحط لنك الموضوع اللي نقل منه ، مش لنك المدونة عامة، بالاضافة الى انه اذا نسخ كلامي نسخ..يا ريت يقول انه الكلام برضو منقول من الموضوع الفلاني و يحط لنك للموضوع، عشان لا تفقدوا مصداقيتكم عند الناس اللي بيتابعوا مدوناتكم، و عشان انا اضمن حق ملكية الكلام و الافكار لنفسي

كيفية وضع و ازالة اظافر التركيب

Date: 2011.03.19 | Category: TC of ur nails, Uncategorized | Response: 12

اهلا بالجميع

اليوم حتكلم عن كيفية وضع و ازالة اظافر التركيب

اوقات اضطر البس اظافر تركيب لما ابغي ارسم ديزاين يبغالو ظفر طويل..زي تدوينة اليوم الوطني او اني ابغي اقص اظافري كلها و اريحها كم اسبوع..فا بحط هذه الاظافر اذا جاتني مناسبة فجأة عشان تبان طويلة و كانها طبيعية.

انا كنت اخاف مرة من فكرة الاظافر التركيب لانها ممكن تتفك في اي وقت اذا ما اتركبت مظبوط.

خلينا نشوف الفيديو.. و بعدين نرجعلكم

نصيحة

افضل طريقة لوضع الظفر التركيب..هو انك تحطي نهايته علي بداية ظفرك و تسحبيه لين نهاية ظفرك..عشان لا يسير في فقاعات هواء بين الظفر و الظفر التركيب و يسير قابل انه يتفك بسرعة

اذا مانتي متعودة على اظافر طويلة..فا قصي الاظافر التركيب اقصر ما يمكن او الشكل اللي تلاقيه مناسب انك تستخدمي يدك بيه..انا تعبني الطول شويه

بالنسبة للغراء…اتوقع انه نوعيته سيئة شويه…لانه ما رضي يخرج الي اليوم ، عندي ظفر ما خرج منه، حاليا ما اعرف غراء افضل منه. لكن اذا جربت في القريب العاجل ان شا الله حعمل تحديث في هذه التدوينة

نصيحتي لا تلبسي اظافر التركيب اكتر من ثلاثة ايام، اظافري انعدمت بعدها

في فرق بين اظافر التركيب و اظافر الاكريليك….التانية بتثبت ع الظفر لمدة اطول و تستخدم اذا ظفرك جزء منه انشق..فا انتي بتحطي شكل طرف ظفر علي طرف ظفرك و تحطي عليه بفرشة خاصة مادة معينة.. لين ما يسير سطح ظفرك متساوي مع الظفر الاكريليك..اذا جربته اكيد حكتب عنه موضوع

ــــــــــــــــــــــــــــــــــــ

الاظافر التركيب و الغراء  تلاقوها في محلات التجميل، في زي اللي استخدمته و في يكون عليه ديزاين او لون جاهز. انا جبته من محمود سعيد لادوات التجميل

اتمنى ان الموضوع يكون افادكم