Archive for the ‘TC of ur nails’ Category

• الاظافر و اشكالها المختلفة

  Date: 2011.01.22 | Category: TC of ur nails | Response: 39

   

  اهلا بالجميع

  بالطبيعة كل واحدة فينا لها شكل اظافر معين و طول مدى معين برضو واللي بيكون متناسق مع حجم ايادينا

  الحمدلله في خمسة اشكال للاظافر ممكن تشوفي اي واحدة منها تليق على شكل و طول مدى ظفرك

   

  nailsmag.com جميع الصور مأخوذة من

   

  ـــــــــــــــــــــــــــــــــــــــــــــــــــــ

  اولا نعرف اقسام الظفر ايش

   

  هذه الصورة من nails-in-london.co.uk

   

  Free Edge: الحافة الحرة او اعلى الظفر

  nail plate or nail bed: سطح الظفر و اللي اعتبره هو مدى الظفر

  nail contour / cuticle: الجلد اللي حول الظفر

  lunula “half moon”: هي المنطقة في اخر الظفر من تحت و يشبهوها بنص القمر و هي قريبة من الجلد او الكيوتيكل

  matrix and root: الماتريكس هو في الاصل جذور الظفر و هو اللي بينتج مادة الكيراتين اللي بتكوّن سطح الظفر

  للمعرفة اكتر عن الموضوع هنا

  ــــــــــــــــــــــــــــ

   

  نجي الان لاشكال الاظافر

   

  الشكل الاول: البيضاوي

  Oval

   

  

   

  الشكل ده افضل شكل بالنسبة لكل اشكال الاظافر

  يقوللك هذا الشكل يليق على الاظافر اللي المدى حقها طويل و كمان قصير

  يعني تقدري تخلي اظافرك طويلة اذا المدى تبع ظفرك طويل

  و كمان تقدري تخلي اظافرك قصيرة اذا المدى تبع ظفرك قصير و يطلّع الشكل مناسب

  حيكون مناسب اكتر اذا كان نهاية الجلد اللي حول الظفر مقوسة

  من مميزات الشكل البيضاوي: يضيف طول للظفر

   

  الاسهم في الصور كلها توضح كيفية برد الظفر عشان يكون بنفس الشكل

  ـــــــــــــــــــــــــــــــــــ

  الشكل التاني: المربع

  Square

   

  

   

   

  الشكل ده مو دايما بيظبط مع كل اشكال الاظافر و مداها

  يظبط مع: الاظافر اللي مداها طويل و خاصة الاظافر النحيفة و الاظافر اللي المدى حقها فلات  او منبسط و مش مقوس

  ما يظبط مع: الاظافر العريضة و قصيرة المدى لانه بيخلي الظفر شكله اقصر و اتخن

  من مميزات الشكل المربع: يضيف طول للاصابع

  ـــــــــــــــــــــــــــــــــ

  الشكل الثالث: المربضاوي او مرضاوي زي ما تبغوا

  هو خليط من المربع و البيضاوي..فا يسير مربضاوي “ترا فجأة ألفت الاسم لاني مش عارفة ايش اسمه بالعربي”

  Squoval

  square + oval

   

  

   

  الشكل ده للاظافر العريضة و اللي مداها قصير..يسير حيكون افضل للي يحبوا الشكل المربع انهم يعتمدوا الشكل ده لانه مربع و الراس يكون بيضاوي

  مميزات الشكل المربضاوي: انه يظهر الاظافر القصيرة و العريضة اقل عرض و قصر

  ــــــــــــــــــــــــــــــــــ

  الشكل الرابع: المدور “الدائري”

  Round

   

  

   

  يظبط مع الاظافر العريضة و اليد اللي حجمها يكون كبير

  و كمان يظبط مع الاظافر اللي مداها قصير

  من مميزات الشكل المدور: يخللي الاظافر العريضة و اليد الكبيرة  تبان بشكل انحف

  ـــــــــــــــــــــــــــــــــ

  الشكل الخامس: Pointed or Stiletto

  صراحة ما لقيتها مسمى تاني غير ام بوز او المبوزة..ممكن تسموها ستيلليتو

   

   

  

   

  تظبط مع الايادي الصغيرة و الاظافر اللي مداها قصير

  تقدر صاحبة الاظافر اللي مداها طويل تسويها بس حيبان شكل يدها مع الاظافر ملفت و زايد عن حده زي مو مبين هنا

   

  هذه الصورة بس مأخوذة من موقع اخر

  يقوللك هذا الشكل من اضعف الاشكال.. و ممكن ينكسر بسرعة

  من مميزات الشكل ابو بوز: انه بيعطي طول للاظافر القصيرة

   

  ــــــــــــــــــــــــــــــــــــــــــــــــــــــــــــــــــــــــ

   

   

  شكل مختلف من الاظافر ” الاظافر المروحة”

  Fan shaped nails

  طبعا مو كل الناس اظافرهم مداها طويل و شكل الجلد من تحت مربع او دائري..في بعض الناس بيكون شكل اظافرهم مختلف عن اللي دايما نشوفو..الشكل هذا هو شكل المروحة

  حتلاحظي بعض البنات اظافرهم بشكل مروحة..لانها تجي ضيقة من عند الجلد من تحت و تبدأ توسع باتجاه اعلى الظفر..اتوقع انا الظفر الاوسط عندي بده الشكل

  اللي اظافرهم بهذا الشكل يستحسن يخلوها دايما قصيرة و مرتبة

  الشكل البيضاوي يظبط مع هذا الشكل و يعمل تمويه لشكل المروحة

  يستحسن الابتعاد عن الشكل المربع و الشكل المربضاوي لانهم بيساعدوا  في اظهار الشكل بوضوح اكتر

  حاولت اجيب صورة مظبوطة لده الشكل بس ما لقيت..اول ما الاقي ححطلكم هي!

  _________________________

   

  بعض النصايح

  اذا انتي من النوع اللي دايما يدك بتتعرض لموية و استخدامات اخرى..عشان تخليها محافظة على شكلها يسير تحتاجي تخلي اظافرك دايما قصيرة او تطول عن جلدك مسافة بسيطة جدا

  و شكل اظافرك  يحدد مدى قوتها..يعني يقوللك الشكل المربع من اكتر الاشكال اللي تعطي قوة للظفر لانه اطراف الشكل كامل متساوية مش زي مثلا الدائري او ام بوز

  اذا حبيتي الشكل البيضاوي بس تبغي ظفرك يكون قوي..ممكن تسوي شكل المربضاوي لانه حيعطيكي قوة الشكل المربع و كمان نهاية ظفرك حتكون بيضاوية او مقوسة

  اذا مدى ظفرك طويل يسير لا تطولي اظافرك..بعد كده الشكل حيكون مو حلو..حلاوة الاظافر اللي مداها طويل انه بتكون مقصوصة لكن برضو اللون بيبان فيها لانه المدى طويل او طويل و عريض

  حتى اذا مدى ظفرك قصير لا تطوليه مرة..بعد كده الشكل حيسير غريب و مرة مو حلو…احس افضل حل انك تخليكي بين البينين..لا مرة طويل و لا مرة تقصيه ع الاخر..خليه طويل بس بشي معقول

  حاولي دايما ترطبي اظافرك و الجلد اللي حولها عشان يكون شكلها لطيف

  حاولي تخللي دايما معاكي في الشنطة كريم مرطب للظفر و الجلد اللي حوله..عشان كل ما افتكرتي تلاقيه معاكي..انا احمس و بشدة انه يكون عندك كمان كريم من لش اسمه

  lemony flutter

  تحطيه قبل النوم كل يوم…رائع جدا و حتلاقي الفرق بنفسك

   

  ــــــــــــــــــــــــــــــــــــــــ

  شرح انواع الاظافر ترجمته من موقع

  Nailsmag

• Nail Envy by O.P.I منتجات

  Date: 2011.01.21 | Category: OPI, TC of ur nails, محلات نزيه | Response: 10

  اهلا بالجميع

  لاحظت مؤخرا انه كتير بنات يبغوا يعرفوا منتجات تعالج اظافرهم و تقويها و تمنعها من التكسر

  O.P.I

  من الشركات اللي بتعتني بده الشي جدا..و اطلقت خط من المنتجات يتعلق بهذا الشي بالزات و سمته

  Nail Envy

  تحت هذا الاسم ستة منتجات…اولها

  Original

  

  هذا المنتج اللي استخدمته و اتكلمت عنه في هذه التدوينة

  هو بكل بساطة مقوي عام للاظافر

  يحتوي علي الكالسيوم و البروتين اللي يخلي اظافرك اقوي و يساعدها تطول و يحافظ عليها من انها تتشقق او تتقشر

  يعطي لمعة جيدة ع الظفر بالاضافة الى انه ينشف بسرعة

  يستخدم كمان كطبقة اولى شفافة قبل المناكير و بعده

  الثاني

  Maintenance

  

  هذا المنتج ينصح بيه للي اساسا اظافرهم قوية عشان يحافظ على قوتها فقط

  من التوصيات عن هذا المنتج انك في حال سارت اظافرك قوية باستخدام واحد من المنتجات فا على طول اتركيه و ابدأي استخدمي هذا المنتج عشان يحافظلك على قوة اظافرك

  و لا ينصح بيه للي اظافرهم حساسة و تتقشر بسرعة و بيستخدموا المنتج الخاص بنوعية اظافرهم

  الثالث

  Dry & Brittle Nails

  

  هو منتج يحتوي على تركيبة مرطبة تساعد في الحفاظ على ليونة الظفر بالاضافة الى احتواءه على فيتامين

  E & C

  اللي هم ضد التأكسد

  ينصح بهذا المنتج للي اظافرهم هشة و ناشفة و بدل ما تنتني “او تنطوي” بتتكسر

  الرابع

  Sensitive & Peeling Nails

  

  منتج ينصح بيه للي اظافرهم حساسة و تتقشر

  مع فيتامين E & Kukui nut oil

  بالاضافة الى انه يسكن الاظافر الحساسة بنبتة الصبار الموجوده في تركيبته

  الخامس

  Soft &  Thin Nails

  

  بتركيبته المقوية و اللي بتحتوي علي الكالسيوم بيحمي الاظافر الرقيقة و النحيفة

  من التوصيات: انك باستخدامك لده المنتج انتي بتضيفي طبقة من الحماية لتقوية اظافرك الرقيقة و يخليها اكثر صلابة

  السادس و الاخير

  Matte

  

  اذا تتذكروا كتبت عن هذا المنتج الجيد جدا في هذه التدوينة

  هذا المنتج هو ٢ في ١

  مقوي و كمان يعطي تأثير حلو علي لون المناكير اللي حاطته

  من اسمه

  Matte

  يعني مطفي

  و تأثيره بيكون بعكس اللون الشفاف العادي لانه بيخللي اللون اللي حاطته يسير مطفي مش بيلمع..مدري اذا تحبوا هذا التأثير واللا لا بس انا اعشقة جدا..بالذات ع اللون الاسود يطلع رائع

  هو يعتبر مقوي زي اول منتج و اللي هو ال

  original

  من التوصيات عليه: انه جيييد جدا للبديكير كقاعدة قبل ما تحطي المناكير

  و من توصياتي انه رائع جدا لما تحطيه كطبقة اخيرة فوق المناكير

  اما عن طريقة استخدام هذه المنتجات فهي كالتالي

  اول شي

  شيلي اي لون مناكير كنتي حطته اول و اتأكدي انه اظافرك نظيفة تماماً

  حطي طبقة من اي منتج من الخمسة منتجات ما عدا منتج

  Maintenance

  و انتظري لين ما ينشف و حطي طبقة تانية

  و افضلي يوم بعد يوم تضيفي طبقة جديدة من واحدة من الخمسة المنتجات اللي حتستخدميه..لين لما توصلي للنتيجة اللي تبغيها..اتركيه و استخدمي منتج

  Maintenance

  عشان يدعم و يحافظ على اظافرك قوية و غير هشة او متقشرة

  و اتبعي نفس الخطوات اللي ذكرتها مع هذا المنتج كمان

  انا عن نفسي ممكن استخدمه مش لمدة يوم كامل…ممكن بس احطه في الليل لمدة ٥ ساعات و اشيله..كرري الشي ده كل يوم تقريبا لمده اسبوع و شوفي النتايج بنفسك

  حل تاني: انك تنتهزي فرصة كل ما حطيتي مناكير انه واحد من المنتجات زي الاوريجينال مثلا هو اللي يكون القاعدة و كمان تحطيه بعد المناكير

  ان شا الله يكون افادكم الموضوع

  ـــــــــــــــــــــــــ

  كل هذه المنتجات موجودة في محلات نزيه

  جدة فرع مركز دانيا – و فرع عند دوار الفلك

  و سلامتكم

• كيف تقصي اظافرك بشكل مربع؟

  Date: 2011.01.18 | Category: Claire's, OPI, TC of ur nails, محلات نزيه, مكياجي | Response: 37

  الموضوع ده كان على لستة الانتظار بس بما انه بعض البنات طلبوه..فا كتبته الاول..نشوف الفيديو و بعدين نقول شوية نصايح

  

  توبة اني اسوي فيديو و اشرح فيه بصوتي و انا ماني محضرة سيناريو..ههههه

  معليه..بس اذا عدته كنتوا حتنتظروا كمان شهر…يللا يا رب تكونوا استفدتوا..هذا اهم شي

  نجي للبعض الملاحظات

  بالنسبة للقصافة..اذا قصيتي ظفرك بيها بشكل مستقيم حيسهللك المهمة اكتر من ما يكون معوج او حاجة

  buffingال

  لا تزودي كتير علي الظفر عشان لا تسير طبقة الظفر نفسها نحيفة و الابيض اللي في نهاية ظفرك يسير شفاف و مصفر

  .انصح انك ما تسوي البفنج ده اللا كل ٤ شهور مرة..او لما تسويه يكون علي خفيف مرة

  عشان تكتمل العملية عندك مقوي من

  O.P.I

  Nail Envy

  nail strengthener

  هو يعتبر طلاء اظافر

  تحطيه كعلاج لساعات او ايام اذا كان ينفع

  كمان ممكن يكون كطبقة شفافة قبل و بعد المناكير… ملمسه جيد، ينشف في ثواني و يعمل لمعه جيدة

  هنا تأثيرة على اظافري بعد التنظيف

  

  و هنا بوز تاني..ههههه

  

  نتايج هذا المقوي ما حتبان الا بعد الاستخدام المنتظم و لمدة بين شهر الى شهرين

  تصبحوا على خير

  

• كيفية وضع المناكير

  Date: 2011.01.02 | Category: INGLOT, OPI, TC of ur nails, محلات نزيه | Response: 0

  اهلا بالجميع

  ايش هي الطريقة الصحيحة لوضع المناكير…هو السؤال اللي اغلب البنات بيسألوه!

  اول شي تتاكدي انه ظفرك نظيف من اي مناكير من قبل او اي كريمات او زيوت..لانه حياثر في شكل المناكير علي ظفرك

  عشان تتاكدي مزبوط افضل شي انك تمسحي اظافرك بمزيل اظافر..احبذ اللي من النوع ابو بدون اسيتون

  بعد كده..غسلي يدك و يللا نبدا الخطوات…

  الخطوة الاولي…المناكير الشفاف

  اتوقع اغلبنا يظن انه هذه الخطوة ماهي مهمة..لكن ع العكس تماما..هي اهم شي و السبب في ذلك..عشان تحمي اظافرك من التبقع بسبب الوان المناكير المختلفة

  انصحكم جميعا انكم تحطوا الطبقة الشفافة بصرف النظر عن لون المناكير “فاتح او غامق” و قوامه “خفيف او تقيل”…الهدف الاول و النهائي هو حماية اظافرك من التبقع و المحافظة علي شكلها نظيف و مرتب

  الخطوة التانية..وضع اللون

  في هذه الخطوة قوام اللون هو اللي يحدد كم طبقة من اللون لازم تحطي

  اذا كان اللون تقيل..طبقتين حتكون مناسبة

  اذا كان خفيف نوعا ما…تلاته طبقات

  اذا خفيف مرة..فا حيكون من تلاته الي خمسة طبقات

  اهم شي لا تحطي طبقة وحدة من اللون حتى لو كان تقيل…لما تحطي طبقتين بيبان شكله احلى و مرتب اكتر بالاضافة الى انه بيعزز درجة اللون اكتر من لما تكون طبقة وحدة

  نصيحة

  يفضل بعد ما حطيتي الطبقة الاولى تنتظري خمسة دقايق..وقتها ممكن تشغلي نفسك باي شي…زي تتفرجي علي تلفزيون مثلا

  بعد كده، حطي الطبقة التانية و انتظري عليها خمسة دقايق اذا كنتي مستعجلة..اما اذا على مهلك فا سيبيها لثمانية دقايق افضل

  الخطوة التالتة…المناكيرالشفاف الطبقة الاخيرة

  بعد ما تخلصي من طبقات اللون..حطي طبقة وحدة من اللون الشفاف..و الهدف من هذه الخطوة..هو الحفاظ علي مظهر اللون و اضفاء لمعه عليه

  نصيحة

  لما تحطي المناكير الشفاف في النهاية..اذا ما انتظرتي كتير علي اللون ينشف..فا طبيعي حتلاقي فرشة المناكير الشفاف اتبقعت من اللون.. و ده الشي اكيد كلنا ما نبغاه يحصل..

  فا انصحك انك تنتظري علي اللون ينشف الي ثمانية دقايق او اكتر قبل المناكير الشفاف..بس اذا حطيتيه بعد خمسة دقايق فا خلي جمبك غطا صغير و عبيه اسيتون…عشان كل ما تتبقع الفرشة..تحطيها في الاسيتون و امسحيها في منديل بسرعة و كملي حطي اللون الشفاف

  امشي ع اللون بفرشة المناكير الشفاف مرة وحدة على الظفر..لا ترجعي لمنطقة سويتيها اول..لانه ده حيلخبط الدنيا

  في الرسمة اللي تحت توضيح لكيفية وضع المناكير بطريقة صحيحة…اعذروني..رسمي سئ جيدا بس المهم عندي انه توصلكم الفكرة

  في الحقيقة فكرة هادي الرسمة اخدتها من مدونة اسمهاLacquerized

  

  ١ بعد ما تكوني اتاكدتي انه ظفرك نظيف..ابدأي حطي المناكير الشفاف و سيبيه ينشف لدقيقة واحدة

  ٢ ابدأي حطي اللون من اسفل الظفر بس بعيد شوية عن الجلد

  ٣ انزلي شوية قريب من الجلد بس لا تكوني قريبة منه مرة عشان لا يتمدد اللون و يروح ع الجلد و وقتها حيكون تنظيفه حوسه شوية

  ٤ مددي اللون باتجاه اطراف الظفر

  ٥ زي مو موضح بالاسهم ابدأي مددي اللون لجهة اليمين من تحت

  ٦ كملي تمديد اللون باتجاه اطراف الظفر

  ٧ و ٨ كرري نفس العملية للجهة التانية من الظفر

  ٩ حطي المناكير الشفاف عشان يعطيه لمعه و يحمي اللون

  كيف تجلسي وقت ما بتحطي المناكير؟

  اجلسي عادي و حطي يدك علي طاولة مرتفعه شويه..او اذا كانت منخفضة عنك فما يهم بس انك حتنحني عشان تقدري تركزي وقت ما بتحطي اللون

  ابدأي بالابهام و انتهاءا بالبنصر عشان كل الاظافر ما تنشف بسرعة زي اصغر واحد

  طبعا اللي يكتبوا باليمين ما حيقدروا يسووا يدهم اليمين و نفس الشي ينطبق علي اللي يكتبوا باليسار

  الحل..انك بالزات لما تجي ع اليد اللي صعب تعمليها..حطي يدك اللي حتتلون ع الطاولة و اليد اللي صعبة عليكي التحكم بيها ع الطاوله برضو و ثبتيها و بس حركي باصابيعك ” يفضل لما تلوني الابهام انك تعملي يدك قبضة”

  مرحلة التنظيف

  المرحلة هادي هي اللي حتحدد الشكل النهائي للاظافر

  في كتير من المرات حتلاقي شوية من اللون طلع بره الظفر او نزل اكتر من اللازم فراح علي جوانب الظفر..مافي مشكلة ممكن تنظفيها بكذا طريقة

  اول شي عندك عيدان القطن اللي تنظف الاذن..خديها و حطيها في الاسيتون و بعدين اضغطي عليها بحيث انك تخليها مسطحة..بعد كده حطيها تاني في الاسيتون و ابدأي نظفي حول الظفر بيها..بس انتبهي مرة كويس عشان لا تمسحي بالغلط جزء من المناكير

  طريقة تانية..

  جيبي فرشة زي دي..هي فرشة ميك اب علي فكرة…مو شرط تعرفي اسمها..بس اختاريها تكون نحيفة و عريضة شوية بده الشكل

  حطي الفرشة دي في الاسيتون و روحي ع الاطراف و شيلي اللون..اتوقع هادي اسهل من اللي قبلها لانها انحف فا تقدر تدخل بيت الظفر و الجلد بسهولة..بس يفضل انك كل ما تخلصي من منطقة..تمسحيها في منديل و بعدين حطيها في الاسيتون تاني لانها ممكن تنقلك اللون لمكان تاني..مو زي القطن يشفط اللون!

  

  الطريقة الاخيرة و اللي استخدمتها و ريحتني مرة هي كالتالي

  جيبي هادي الاداه اللي لتنظيف الاسنان بس لازم تكون نهايتها عريضة و مسطحة زي اللي في الصورة..و حطي علي الجزء العريض اللي تحت مناكير شفاف بسرعة و شي قليل..و بعدها جيبي قطنة اللي بنشيل بيها المناكير و فكفكيها و لفيها حول المنطقة اللي حطيتي عليها المناكير بس كمية القطن تكون قليلة عشان لا تتخن و صعب وقتها تسويها مسطحة.. حطيها في الاسيتون و اضغطي عليها و بعدين حطيها تاني و ابدأي ظبطي نهايات اظافرك

  

  غير هادي الحلول العمليه..فيه قلم اسيتون مخصوص عشان تصححي بيه..انا شفتو في الصالون بس..لكن اتوقع ينباع في محلات مستحضرات التجميل بس ما قيد جربته

  اخر مرحلة  و هي تسريع التنشيف

  في طرق كتير تقدري تسرعي التنشيف بيها

  بعد ما تحطي اخر طبقة و اللي هي المناكير الشفاف

  بخي بختين علي كل ظفر من

  Rapidry by OPI

  و فيه منه مناكير كمان.

  

  او حطي قطرة الي قطرتين من

  Drip Dry by OPI

  

  او

  Dry&Shine by INGLOT

  

  و انتظري وحتلاقي بعد خمسة دقايق او اقل و انتي تقدري تستخدمي اظافرك عادي..بس طبعا لا تحكي شعرك مثلا او تطلعي شي من الشنطة..هذه الخطوة سويها بعد ٧ دقايق تقريبا..انا عن نفسي بسيبها ٨ الي ١٠ عشان اكون متاكده انه اللون نشف تمام

  منتجات OPI تلاقوها في محلات نزيه  مركز دانيا – عند دوار الفلك

  منتجات INGLOT  تلاقوها في محل انجلوت في رد سي مول..اتوقع الدور الاول او الارضي

  واو..طولت عليكم..صح؟؟  P:

  يللا انجوي