Archive for the ‘TC of ur nails’ Category

• الوان المناكير و لون بشرتك

  Date: 2011.09.13 | Category: TC of ur nails | Response: 7

  

  الصورة مأخوذة من هذا الموضوع

  اهلا بالجميع

  ! اولا، رمضان كريم و عيد سعيد مررة متأخرة بس المدونة قررت تاخد اجازة هي كمان!

  نزولا عند رغبة احد المتابعات للمدونة اني اكتب موضوع عن كيف تحددي لون المناكير اللي يناسب لون بشرتك..فا حبيت اكتب ده الموضوع بناءا على رايي الشخصي

  اولا

  احلى حاجة في الالوان اختلافها و اختلاف تدرجات اللون الواحد..و اكتر شي يساعدك انك تبرزي اللون اللي حتحطيه هو انك تجعلي بينه و بين بشرتك تباين او تناسق..يعني اذا بشرتك فاتحة ابعدي عن المناكير الفاتح و هكذا…و لكنها ماهي قاعدة ثابته مع كل درجات الالوان

  ثانيا

  ايش المناسبة اللي حتحضريها و تبغى تختاريلها لون مناكير مناسب؟..يعني مثلا عندك سهرة، او حتقدمي بريزنتيشن او وظيفتك معلمة او حتفتتحي معرضك الجديد بحضور شخصيات مهمة؟

  نبدأ بالسهرات او العزايم..لانها اكتر شي بنسويه في البلد هنا

  دايما نحب نبان باحلى منظر في السهرات او العزايم..فا تلاقي الاغلب يميل لوضع اللون الاحمر و تدرجاته لين الزهري الفاتح..يعني انا اعتبر انه درجات الاحمر و الزهري هي اللي تليق علي معظم الوان اللبس في عالم المناكير فقط..يعني الاسود طلع منها لانه و ببساطه مو من اللائق وضعه في مناسبه رسميه مثلا..هذا من وجهه نظري انا فقط.

  نجي للالوان اللي ما ينفع تنحط لا في السهرات و لا العزايم اللي يكون فيها ستات كبار..اولا درجات الازرق لين الاصفر و بالاضافة للاسود.

  بعضكم حيقول ايش دخل الستات الكبار في لون المناكير اللي ححطه؟.يعني لما تروحي عزومه عند صحباتك و كلكم بنات في قلب بعضكم ..عادي اذا حطيتي لون اخضر “فسفوري” او لون ازرق مشع..لكن لما يكون اغلب العزومة ستات..من الافضل انك تباني ليدي Lady في المكان. و اذا ما كنتي عارفة بالظبط الاشخاص اللي حيحضروا العزومة..ممكن تكوني في السيف سايد و تحطي فوشي مثلا

  اذا رايحة تقدمي برزينتيشن او انتي معلمه

  بما انه حيكون عليك العين طول الوقت و الناس اللي تستمعلك تحتاج تركّز في كلامك مش في يدك..فا يفضل انك تحطي لون فاتح زي اللحمي ..البيج ..من رايي بلاش الابيض لانه يعتبر لون ملفت خاصه الابيض اللي علي ازرق.

  اذا حتكوني في حدث مهم انتي صاحبته…فا الالوان اللي ذكرتها دوبني حتكون لائقة..و اذا حتلقي كلمه فقط فا تقدري تحطي اي لون تحبيه باستثناء الالوان اللي ما تنحط في المناسبات الرسميه طبعا.

  دحين نجي لالوان البشرة

  نبدأ بذوات البشرة الفاتحة

  تقريبا كل درجات الالوان تليق عليهم..ما عدا الدرجات الفاتحة ..زي البيج و الرمادي الفاتح جدا لانه حيبين بشرتك باهته و ع الجهة الاخرى ما بيليق عليهم برضو من الغوامق اللي هو البني او الكحلي الغامق و العودي “النبيتي”..اصلا اول ما فكرت في دولا اللونين افتكرت ايام التسعينات لما كان الروج العودي و البني الغامق موضه..فكانت البنت اللي بشرتها بيضا تحطه كان بيبان شكلها مره غلط..بالمناسبة انا كنت من البنات اللي حطيت ده اللون.. و الي الان ما اقدر اشوف صوري القديمة بسبب الخطأ الفادح ده

  الوان تليق ع البشرة الفاتحة

  

   الوان ما تليق ع البشرة الفاتحة

  

  ذوات البشرة الحنطية

  من وجهة نظري يليق عليهم الالوان كلها بس طبعا باستثناء الالوان القريبة من لون البشرة زي الصورة التانية اللي تحت

  

  لون ما يليق على ذوات البشرة الحنطية لانه قريب جدا من درجة لون البشرة فا باينة اليد باهتة

  

  ذوات البشرة الغامقة

  يليق عليهم الالوان اللحمية و الدرجات الفاتحة من جميع الالوان و درجات الالوان الباستيل بالاضافة الى الالوان المُشعّة و ليست الفسفورية، و ما يليق عليهم الالوان الغامقة مثل الاسود و البني و الكحلي.

  هنا في حاجة حابة اقولها عن رأيي في الالوان الفسفوريه اللي بيحطوها ذوات البشرة الغامقة، صراحتن انا ما احبذ هذه الالوان علي بشرة غامقة لانها بتبرزها اكتر و بيكون المنظر ماهو حلو و ماهو لايق، اذا رايحة حفلة دي جي ممكن تحطي ده اللون لانه اساسا محد شايف التاني..لكن مثلا تكوني في سوق او في الشغل و حاطه ده اللون…صعبة شوية

  نصيحة

  اللون الفسفوري او المشع اذا حطيتيه يحبذ انه تكون اظافرك قصيرة و مهذبة…الالوان دي علي الاظافر الطويلة مرة حتخرب شكل يدك ككل

  اللون اللي في الصورة حسيته ممكن يكون مرتب ع اليد السمراء و كل ما كان لونه اغمق درجة كمان حيكون افضل

  

  لون غير مناسب للبشرة الغامقة، صراحة متعب للعين..ايش رأيكم انتوا؟

  

  او بي اي سهلت المهمة في اختيار الالوان اللي تناسب بشرتك عن طريق موقعها او عن طريق برنامج ع الايفون…كل اللي عليك تسويه هو انك تختاري لون بشرتك و اي لون حابه تعرفي اذا يليق عليك او لا.

  كتبت عنه موضوع هنا

  هنا حوريكم لون معين علي كل الوان البشرة

  زي منتو ملاحظين اللون بالنسبة للبشره الغامقة واللي افتح شويه مناسب جدا و رايق جدا على لون البشرة بينما اول صورة و هي للبشرة الفاتحة مبهتها جدا

  

  لبسك و لون المناكير

  اللون ذو الشعبية الكبرى بالنسبة للمناكير هو اللون الاحمر و درجاته و ده الموضوع ما حنختلف عليه لكن هل كل الملابس يليق عليها الاحمر او الفوشي؟، الاجابة للاسف لا

  اللون الاحمر باختلاف درجاته ممكن يمشي مع كتير ملابس لكن بعضها اللون الاحمر بيعمل ازمة للشكل النهائي

  يعني مثلا لبس ابيض و لبس اسود، الابيض حيمشي معاه درجات الاحمر القاتمة فقط بينما الاسود حيمشي معاه درجات الاحمر الفاقعة نوعا ما

  بينما اذا لابسة تركواز او لحمي ما حيمشي عليهم الاحمر بتاتا، و هنا الخيار الامثل هو الفرنش مناكير، هذا المناكير هو افضل حل اذا ما لقيتي اي لون يمشي مع لبسك

  نقطة تانية، ابدا لا تحطي مناكير لونه هو نفس لون الفستان..ابدا لا تسوي كده

  المناكير الاصفر صعب ، يعني اولا ما بيليق مع كل الالوان و كمان المناسبات، اللبس المناسب له هو الرمادي و كمان الابيض بس مع الابيض يحبذ انك تحطي درجة فاتحة نوعا ما من الاصفر

  نجي للون الاسود، واللي هو سيد الالوان بس في الملابس و مش في المناكير، اللون ده احلى لبس ممكن يبرزه هو الذهبي و اوقات الفضي، انا بالنسبة لي ما حبيته على يدي ابدا و اشوف انه يتلبس في دي جي بس لكن ما افضله في الزيارات حتي لو لصحباتي او مناسبات تانية، هذه وجهة نظري انا

  احب اعرف ايش وجهة نظركم؟؟

  بيني و بينكم….

  اوقات لما تكون نفسيتي مش ولا بد ..اتعمد اخالف اي شي اشوفو حلو..يعني مثلا..انا ما يليق علي يدي اللون الكحلي..لكن اوقات احطه بالعناد..فا طبعا هذه القوانين مو كلنا بنلتزم بيها…اهم شي اذا نفسيتك تمام..حطي اللون اللي تحسيه حيظهر اظافرك بشكل جميل

  مو معناتو اللون قريب من لون بشرتك و حيبهّت كل يدك انك ما تحطيه، بالعكس ممكن تحطيه في مناسبات ما تتطلب تركيز كتير على يدك زي بريزنتيشن او انه وظيفتك معلمة

  الالوان الفاتحة و الالوان الفسفورية تليق مرة مع البشرة البرونزيه او المتشمسة، جربيها و صدقيني حيعجبك شكل اظافرك

  في النهاية موضوع اختيار الالوان بيرجع لشخصية و اسلوب كل واحدة فينا، هي كيف تبغى تعرّف عن نفسها امام الناس التانيين، فالشخصية الهابقة اكيد حتختار الوان تناسب شخصيتها او مودها، و الشخصية الرايقة حتلاقيها تميل لاختيار الوان رايقة زيها و مافيها شي يلفت كتير بس طبعا بدون اغفال عامل لون البشرة لانه مهم جدا.

  شكراً لمتابعتكم…و وحشتوني

• مناديل “جين” الجاهزة لازالة المناكير

  Date: 2011.06.01 | Category: TC of ur nails, غيره | Response: 17

  

   

   

  اهلا بالجميع

   

  اليوم عندي موضوع سريع و خفيف عن مناديل لازالة المناكير اسمها جين خالية من الاسيتون

  نشوف الفيديو و نرجعلكم

   

   

   

   

  في البداية هل فعلا لا تحتوي هذه المناديل على اسيتون؟؟…لما قريت المكونات طلع انها تحتوي على مادة شبيهة نوعا ما بالاسيتون

  لان احد المكونات اسمه

  methoxyisopropanol

  و مادة البروبانول هذه هي مادة شبيهه بالاسيتون…فا اتوقع انها تحتوي ع الاسيتون و لكن بشكل مخفف او مركب..يعني مش مكون رئيسي

   

  من مميزات استخدام هذه المناديل….

  هم كاتبين انه يمكن استخدامه للاظافر التركيب..لكن شخصيا ما جربته فما اقدر احكم

  هم كاتبين انه لا يحتوي ع الاسيتون…لكن انا عندي شك بسيط في ده الموضوع زي ما ذكرت فوق

  هو اذا لاحظتوا من الفيديو انه فيه زيت..هو بلا شك الطف ع الظفر و الجلد اكتر من مزيل المناكير السائل العادي..لكن اوقات الزيت اللي في المنديل ما بيسهل عمليه الازاله كتير

  بالاضافة الى كونه في علبه و المناديل نفسها محطوطة في اظرف منفصلة هذا يحمسك اكتر انك تشيليه معاك في السفر او في شنطة يدك بدون الخوف من انه يبقع الشنطه دام انه في اظرف محكمة الاغلاق مقارنة بالقوارير و كمان هو منديل منه فيه..فما حتحتاجي قطن..يعني هو بصراحة مفيد وقت السفر فقط

   

  من مساوئ استخدام هذه المناديل…

  له ريحة بالنسبه لي ما حبيتها

  يزيل المناكير بطريقة انا اشوفها عادية جدا..حتى كمان اقل مما كنت اتوقع..انا بالنسبة لي القطن افضل..يعني ماهو مرة مريح في الاستخدام و لكن في النهاية بيؤدي الغرض

   

  __________________

  تقدروا تلاقوا المناديل هذه في سوبر ماركت الدانوب

  سعرها 17 ريال

   

• كيفية وضع و ازالة اظافر التركيب

  Date: 2011.03.19 | Category: TC of ur nails, Uncategorized | Response: 12

   

   

  اهلا بالجميع

   

  اليوم حتكلم عن كيفية وضع و ازالة اظافر التركيب

   

  اوقات اضطر البس اظافر تركيب لما ابغي ارسم ديزاين يبغالو ظفر طويل..زي تدوينة اليوم الوطني او اني ابغي اقص اظافري كلها و اريحها كم اسبوع..فا بحط هذه الاظافر اذا جاتني مناسبة فجأة عشان تبان طويلة و كانها طبيعية.

   

  انا كنت اخاف مرة من فكرة الاظافر التركيب لانها ممكن تتفك في اي وقت اذا ما اتركبت مظبوط.

   

  خلينا نشوف الفيديو.. و بعدين نرجعلكم

   

  نصيحة

  افضل طريقة لوضع الظفر التركيب..هو انك تحطي نهايته علي بداية ظفرك و تسحبيه لين نهاية ظفرك..عشان لا يسير في فقاعات هواء بين الظفر و الظفر التركيب و يسير قابل انه يتفك بسرعة

  اذا مانتي متعودة على اظافر طويلة..فا قصي الاظافر التركيب اقصر ما يمكن او الشكل اللي تلاقيه مناسب انك تستخدمي يدك بيه..انا تعبني الطول شويه

  بالنسبة للغراء…اتوقع انه نوعيته سيئة شويه…لانه ما رضي يخرج الي اليوم ، عندي ظفر ما خرج منه، حاليا ما اعرف غراء افضل منه. لكن اذا جربت في القريب العاجل ان شا الله حعمل تحديث في هذه التدوينة

  نصيحتي لا تلبسي اظافر التركيب اكتر من ثلاثة ايام، اظافري انعدمت بعدها

  في فرق بين اظافر التركيب و اظافر الاكريليك….التانية بتثبت ع الظفر لمدة اطول و تستخدم اذا ظفرك جزء منه انشق..فا انتي بتحطي شكل طرف ظفر علي طرف ظفرك و تحطي عليه بفرشة خاصة مادة معينة.. لين ما يسير سطح ظفرك متساوي مع الظفر الاكريليك..اذا جربته اكيد حكتب عنه موضوع

   

  ــــــــــــــــــــــــــــــــــــ

  الاظافر التركيب و الغراء  تلاقوها في محلات التجميل، في زي اللي استخدمته و في يكون عليه ديزاين او لون جاهز. انا جبته من محمود سعيد لادوات التجميل

   

  اتمنى ان الموضوع يكون افادكم

   

   

   

   

• فرنش مناكير – باستخدام اللصقة

  Date: 2011.01.26 | Category: Sensi, TC of ur nails | Response: 24

  

  اهلا بالجميع

  طبعا انا عارفة قد ايش انتوا متحمسين لده النوع من المناكير فا حبيت احطلكم الفيديو اليوم

  بالنسبة للفرنش المناكير، كنت حابة اشرحلكم شي بسيط قبل ما نبدأ

  الفرنش مناكير هو فن من فنون المناكير صمم ليشابه الاظافر الطبيعية

  و هو متكون من لون مناكير زهري و اطراف لونها ابيض

  نشأته كانت منذ القرن الثمانية عشر في باريس و بعد كده اصبح مشهور في عقد العشرينات و الثلاثينات

  المناكير او المنيكيور

  هو علاج تجميلي لاظافر اليد و اللي ممكن الوحدة تعملها بنفسها او في الصالون.

  تبدأ مراحل المنيكيور بتظبيط اطراف الاظافر و تنظيفها و بردها و من ثم عمل مساج لليد و انتهاءا بوضع اللون على الاظافر.

  و كلمة بيديكيور اذا سمعتوها من قبل هي لتنظيف و علاج اظافر الارجل

  كلمة منيكيور مشتقة من كلمة لاتينية

  Menus تعني اليد

  تعني الاعتناء Cura

  يعني منيكيور هو الاعتناء باليد

  يعني بالعربي كده الوان المناكير اللي احنا بنستخدمها ماهي اسمها مناكير اسمها طلاء اظافر..لكن اللي اتعرف بيننا و انتشر بعد كده هو كلمة مناكير على لون طلاء الاظافر اللي بنحطه

  اتمنى اني اكون افدتكم بدي المعلومة

  المعلومات هذه ترجمتها من ويكيبيديا

  ـــــــــــــــــــــــــــــــ

  في كزا طريقة لعمل الفرنش مناكير..اليوم حستعرض واحدة من هذه الطرق….

  ملاحظات

  التوقيت:

  بعد ما حطينا الطبقة الشفافة الاولي ننتظر ٨ دقايق عشان ينشف تمام

  بعد ما حطينا اللون الزهري ننتظر ٢٥ دقيقة عبال ما ينشف ..و هنا انتظرنا مدة اطول عشان حنحط اللصقة فلازم اللون ينشف تمام عشان اللصقة لا تخرب الطبقات اللي حطيناها

  بعد ما حطينا الطبقة الاولى من اللون الابيض على اطراف الاظافر ننتظر ٤ دقايق بعد كده نحط الطبقة التانية و ننتظر ١٠ دقايق

  بعد ما حطينا الطبقة النهائية من اللون الشفاف ننتظر ١٠ دقايق قبل ما نستخدم اظافرنا في اي شي..عشان ما يضيع تعبنا و وقتنا في عمل الفرنش مناكير

  بما انه الوقت اللي حتاخديه عشان تسوي الفرنش مناكير حوالي ٥٧ دقيقة..فا يستحسن اذا عندك مناسبة انك تبدأي من بدري تعملي الخطوات..عشان لا تتأخري و تعمليه بسرعة و يطلع شكله ملخبط

  في الصور زي منتو شايفين اللون مش زهري بالظبط و ده لاني اعتمد طبقة وحدة و كانت خفيفة من اللون الزهري..اذا حبيتي تزودي الطبقات ممكن بس لازم تنتظريها تنشف لوقت اطول او انك تستخدمي لون زهري اوضح من هذا و تكتفي بطبقة وحدة

  

  

  انصح و بشدة انك تصنفري اظافرك قبل ما تعملي الفرنش مناكير عشان يبان شكلها مرتب و ناعم جدا، طريقة الصنفرة تلاقيها في هذا الفيديو

  الاداة اللي لونها الزهري اللي جات مع علبة سينسي ما اتكلمت عنها..هي تستخدم لتظبيط نهاية الاظافر و ممكن صنفرة الظفر كمان بس يستحسن تستخدمي الاداة الكاملة اللي ذكرتها في تدوينة “كيف تقصي اظافرك بشكل مربع؟”

  المناكير الابيض اذا حتحطي منه طبقتين فيستحسن ان الطبقة الاولي تكون خفيفة و التانية هي اللي تكتري اللون شوية مرة..عشان لا يكتر بزيادة و يطلع الشكل مو طبيعي

  مع زيادة الهبقات اللي بتسير في الحياة..الفرنش مناكير سار بكزا لون و كزا شكل و حالة

  لكن احب اذكر انه الفرنش المناكير التقليدي اللي بشرحه اليوم يتكون من الالوان التالية

  اللون الشفاف طبعا

  اللون الابيض لاطراف الظفر

  و اللون الزهري او اللون البيج او اللون اللحمي …هي هذه الالوان اللي ممكن تستخدميها اذا تبغي تسوي فرنش مناكير تقليدي

  اما الالوان التانية اذا حتستخدميها..فيعتبر فرنش مناكير عصري او حق العصر اللي احنا عايشين فيه ده!

  ـــــــــــــــ

  حبيت اعرضلكم صورة لعلبة سينسي من ورا..فيها تعليمات كيفية الاستخدام بالاضافة الي المكونات

  

  بس لاحظت شي  اثار تساؤل عندي

  لاحظت انهم كاتبين تاريخ انتهاء للمناكير.. و انا اللي اعرفه انه المناكير مالو تاريخ انتهاء..لكن دام انهم هم اللي كاتبينها يسير له تاريخ انتهاء..بس اتوقع اذا مو مكتوب على اي مناكير تاريخ انتهاء يعني معناتو مالو

  

  ـــــــــــــــــــــــــــــــــــــــــــــــــ

  علبة سينسي للفرنش مناكير متواجدة طبعا في محلات سينسي

  بس صراحة انا اشتريت العلبة من فترة و كمان مش من محلاتهم كان من محل في عمارة الكورنيش في البلد

  فما اعرف اذا لسه يبيعوها او لا..اتمنى يكونوا لسه بيبيعوها

  اتمنى يفيدكم الموضوع

  و انتظروا مواضيع جيدة زي ده

  D: