الاظافر و اشكالها المختلفة

 

اهلا بالجميع

بالطبيعة كل واحدة فينا لها شكل اظافر معين و طول مدى معين برضو واللي بيكون متناسق مع حجم ايادينا

الحمدلله في خمسة اشكال للاظافر ممكن تشوفي اي واحدة منها تليق على شكل و طول مدى ظفرك

 

nailsmag.com جميع الصور مأخوذة من

 

ـــــــــــــــــــــــــــــــــــــــــــــــــــــ

اولا نعرف اقسام الظفر ايش

 

هذه الصورة من nails-in-london.co.uk

 

Free Edge: الحافة الحرة او اعلى الظفر

nail plate or nail bed: سطح الظفر و اللي اعتبره هو مدى الظفر

nail contour / cuticle: الجلد اللي حول الظفر

lunula “half moon”: هي المنطقة في اخر الظفر من تحت و يشبهوها بنص القمر و هي قريبة من الجلد او الكيوتيكل

matrix and root: الماتريكس هو في الاصل جذور الظفر و هو اللي بينتج مادة الكيراتين اللي بتكوّن سطح الظفر

للمعرفة اكتر عن الموضوع هنا

ــــــــــــــــــــــــــــ

 

نجي الان لاشكال الاظافر

 

الشكل الاول: البيضاوي

Oval

 

 

الشكل ده افضل شكل بالنسبة لكل اشكال الاظافر

يقوللك هذا الشكل يليق على الاظافر اللي المدى حقها طويل و كمان قصير

يعني تقدري تخلي اظافرك طويلة اذا المدى تبع ظفرك طويل

و كمان تقدري تخلي اظافرك قصيرة اذا المدى تبع ظفرك قصير و يطلّع الشكل مناسب

حيكون مناسب اكتر اذا كان نهاية الجلد اللي حول الظفر مقوسة

من مميزات الشكل البيضاوي: يضيف طول للظفر

 

الاسهم في الصور كلها توضح كيفية برد الظفر عشان يكون بنفس الشكل

ـــــــــــــــــــــــــــــــــــ

الشكل التاني: المربع

Square

 

 

 

الشكل ده مو دايما بيظبط مع كل اشكال الاظافر و مداها

يظبط مع: الاظافر اللي مداها طويل و خاصة الاظافر النحيفة و الاظافر اللي المدى حقها فلات  او منبسط و مش مقوس

ما يظبط مع: الاظافر العريضة و قصيرة المدى لانه بيخلي الظفر شكله اقصر و اتخن

من مميزات الشكل المربع: يضيف طول للاصابع

ـــــــــــــــــــــــــــــــــ

الشكل الثالث: المربضاوي او مرضاوي زي ما تبغوا

هو خليط من المربع و البيضاوي..فا يسير مربضاوي “ترا فجأة ألفت الاسم لاني مش عارفة ايش اسمه بالعربي”

Squoval

square + oval

 

 

الشكل ده للاظافر العريضة و اللي مداها قصير..يسير حيكون افضل للي يحبوا الشكل المربع انهم يعتمدوا الشكل ده لانه مربع و الراس يكون بيضاوي

مميزات الشكل المربضاوي: انه يظهر الاظافر القصيرة و العريضة اقل عرض و قصر

ــــــــــــــــــــــــــــــــــ

الشكل الرابع: المدور “الدائري”

Round

 

 

يظبط مع الاظافر العريضة و اليد اللي حجمها يكون كبير

و كمان يظبط مع الاظافر اللي مداها قصير

من مميزات الشكل المدور: يخللي الاظافر العريضة و اليد الكبيرة  تبان بشكل انحف

ـــــــــــــــــــــــــــــــــ

الشكل الخامس: Pointed or Stiletto

صراحة ما لقيتها مسمى تاني غير ام بوز او المبوزة..ممكن تسموها ستيلليتو

 

 

 

تظبط مع الايادي الصغيرة و الاظافر اللي مداها قصير

تقدر صاحبة الاظافر اللي مداها طويل تسويها بس حيبان شكل يدها مع الاظافر ملفت و زايد عن حده زي مو مبين هنا

 

هذه الصورة بس مأخوذة من موقع اخر

يقوللك هذا الشكل من اضعف الاشكال.. و ممكن ينكسر بسرعة

من مميزات الشكل ابو بوز: انه بيعطي طول للاظافر القصيرة

 

ــــــــــــــــــــــــــــــــــــــــــــــــــــــــــــــــــــــــ

 

 

شكل مختلف من الاظافر ” الاظافر المروحة”

Fan shaped nails

طبعا مو كل الناس اظافرهم مداها طويل و شكل الجلد من تحت مربع او دائري..في بعض الناس بيكون شكل اظافرهم مختلف عن اللي دايما نشوفو..الشكل هذا هو شكل المروحة

حتلاحظي بعض البنات اظافرهم بشكل مروحة..لانها تجي ضيقة من عند الجلد من تحت و تبدأ توسع باتجاه اعلى الظفر..اتوقع انا الظفر الاوسط عندي بده الشكل

اللي اظافرهم بهذا الشكل يستحسن يخلوها دايما قصيرة و مرتبة

الشكل البيضاوي يظبط مع هذا الشكل و يعمل تمويه لشكل المروحة

يستحسن الابتعاد عن الشكل المربع و الشكل المربضاوي لانهم بيساعدوا  في اظهار الشكل بوضوح اكتر

حاولت اجيب صورة مظبوطة لده الشكل بس ما لقيت..اول ما الاقي ححطلكم هي!

_________________________

 

بعض النصايح

اذا انتي من النوع اللي دايما يدك بتتعرض لموية و استخدامات اخرى..عشان تخليها محافظة على شكلها يسير تحتاجي تخلي اظافرك دايما قصيرة او تطول عن جلدك مسافة بسيطة جدا

و شكل اظافرك  يحدد مدى قوتها..يعني يقوللك الشكل المربع من اكتر الاشكال اللي تعطي قوة للظفر لانه اطراف الشكل كامل متساوية مش زي مثلا الدائري او ام بوز

اذا حبيتي الشكل البيضاوي بس تبغي ظفرك يكون قوي..ممكن تسوي شكل المربضاوي لانه حيعطيكي قوة الشكل المربع و كمان نهاية ظفرك حتكون بيضاوية او مقوسة

اذا مدى ظفرك طويل يسير لا تطولي اظافرك..بعد كده الشكل حيكون مو حلو..حلاوة الاظافر اللي مداها طويل انه بتكون مقصوصة لكن برضو اللون بيبان فيها لانه المدى طويل او طويل و عريض

حتى اذا مدى ظفرك قصير لا تطوليه مرة..بعد كده الشكل حيسير غريب و مرة مو حلو…احس افضل حل انك تخليكي بين البينين..لا مرة طويل و لا مرة تقصيه ع الاخر..خليه طويل بس بشي معقول

حاولي دايما ترطبي اظافرك و الجلد اللي حولها عشان يكون شكلها لطيف

حاولي تخللي دايما معاكي في الشنطة كريم مرطب للظفر و الجلد اللي حوله..عشان كل ما افتكرتي تلاقيه معاكي..انا احمس و بشدة انه يكون عندك كمان كريم من لش اسمه

lemony flutter

تحطيه قبل النوم كل يوم…رائع جدا و حتلاقي الفرق بنفسك

 

ــــــــــــــــــــــــــــــــــــــــ

شرح انواع الاظافر ترجمته من موقع

Nailsmag

54 thoughts on “الاظافر و اشكالها المختلفة

  1. ياشيخة واللهِ إنك أحسن وحدة :mrgreen:
    هذا الموضوع جداً رهيب ما شاء الله :cool:

    عن نفسي أحب الشكل المدور القصير بحكم إني يومياً أغسل مواعين وحالات صعبة :mrgreen:

    بس بصراحة الأظافر المبوزة دي أول مرة أشوفها ، أحسها تخوّف :shock:

    طيب نجي للسؤآل : الكريم دا اللي قلتي عليه فين الأماكن اللي ممكن ألقاه فيه ؟؟
    <<< ترا بسببك إن شاء الله بأدمن التسوق :cool:

    • يا هلا والله :grin:
      من جد هادي ام بوز مرة احسها مرة سيئة و ماهي عمليه نهائي
      و على قولك تخوف ههههه
      بالنسبة للكريم هو من محل لش اللي في روشان مول..قدام سوبرماركت بنده بالظبط
      حتلاقي محل طالع منه ريحت صوابين و كده النظافة بتشع منه..فا حتعرفي فينه على طول باذن الله

      ههههههه….بس الله يستر ما اخليكي ع الحديدة بعد التدوينات اللي بكتبها..ههههه

  2. Pingback: Tweets that mention الاظافر و اشكالها المختلفة | الوان مناكير -- Topsy.com

  3. أنا دائماً بعتمد الشكل (المربضاوي) و أنا فعلاً أظافري عريضة و مداها قصير…
    طلعت بعتمد الشكل الأفضل :grin:
    مدونة جميلة…
    سأكون بالمتابعة بإذن الله :)

  4. الله الله ايش الحركات هذي ابداع من قلب :grin:
    طيب اللي ماعندو Free Edge
    بصراحه هذا الجزء مظلوم عندي دايم انحتوا
    ما ارتاح اذا صار موجود بس مشكلتي احب المناكير :oops:
    وتعجبني شكل الاضافر على الناس بس عليا مااخليها فحالها :roll:
    من الاشكال اللي حطيتيها عجبتني المربع+المدور اوما المثلث احسه نفس حقين الايمو :evil:
    الله يعطيك العافيه على التدوينه الرهيبه
    وبنتظار طريقة المناكير للاضافر المنقرضه :mrgreen:

    • اهلين كيان
      حتى لو بتنحتي اظافرك..برضو تقدري تحطي مناكير بس هو اهم شي بعد المناكير لا تنحتيهم
      تسلمي حبيبتي و مبسوطة انه الموضوع عجبك

    • هممم..يمكن قصدك يدك صغيرة؟؟
      طيب مدى ظفرك طويل واللا قصير؟؟
      عشان ده حيحدد اكتر
      اذا عرفت حجم يدك صغيرة او كبيرة و مدى ظفرك اقدر اقوللك تعتمدي اي شكل من الخمسة اشكال

  5. ماشاء الله شرحك مره روعه واسلوبك راقي

    بس انا عندي مشكله بأظافري طبعا بس ظفر السبابه بكل يديني دايما لما اطوله ينمو على تحت يعني مقوس ماادري ليه اذا عندك علاج اسعفيني فيه بسررررعه والله تعبت منهم اتمنى يكون مستقيم

    والف الف شكر على مدونتك الاكثر من رووووعه تسلمي ياقمر

  6. الله يعطيك الف عافيه

    ماقصرتي يالغلا والله اتمنى احصل علاج المشكله مو كل

    اظافري بس ظفرين انا بحثت بالعم قوقل وحصلت بنات مثلي ويقولون انه فيه كالونيا نوبلتي بس ماادري وين احصلها وبنفس الوقت متخوفه منها

    انتي شنو رايك حبيت اخذ رايك لأني اعتبرك ماشاء الله دكتوره

    وردي قبل ردي

    • الله يعافيكي
      بس صراحة ما فهمت ايش مشكله اظافرك
      بالنسبة للكلونيا يا ريت تجبيلي الموقع حقها ..صورة لها..لاني دورت و ما لقيت اي شي عنها

      مستنية الرد

  7. انا معتمدة المربضاوي

    من سنة كنت ادور ع الطريقة اللي ابرد فيها
    لأني كنت اروح الصالون بس علشانني ما اضبط الشيب

    عرفت شغلات جديدة

    يعطيك العافية

  8. اتوقع اني مروحه

    انا مو عارفه لاظافيري ااابد

    ياليت لو تساعديني

    • اذا كان ضيق من عند الجلد تحت و يوسع باتجاه اعلى الظفر يسير اظافرك شكلها مروحه..اتاكدي و شوفي و قارني حسب الشرح اللي حاطته..و اذا تبغي اي اساعدك ان شا الله :smile:

  9. تجنيي ي ختي

    انا من تحت اظفيري مره خربانه ولمن تطول ما تكون نفس الشكل ما عندي مشكله لو اصورها لك بس كيف ارسلها

    :oops:

  10. السلام عليكم ورحمة الله وبركاته
    بصراحة ماشاء الله عليك مبدعه ياقلبي وتحبي تفيدي غيررك الله يكتب لك الاجر
    تمنيت اني من زمان عرفت امدونه حقتك
    انا احب الاظافر وحاليا بحاول اتعلم واجربوكثير استفدت من مدونتك واي شيء اطبقة بصورة واوريك
    طلب صغير انا يدي :cry: من الجامعه احسها غمقت شوي بس الكف بالرغم اني احط واقي

    لو تعرفي شيء يساعدني او البنات اللي يزورو المدونه ياليت ما احد يبخل علي

    • اهلين اختي…شكرا علي كلامك الحلو
      و نورتي مدونتي
      للاسف انا ما عندي فكرة او تجربه في المشكله اللي بتتكلمي عنها
      اكيد اذا شفتي دكتورة جلد حتفيدك اكتر منني

      شكرا مرة تانية

    • اهلن اختي

      برأيي جربي الشكل المربع و الدائري
      و شوفي اي منهم يظبط مع شكل اظافرك

      مع المحاولة بكذا شكل تقدري تحددي اي شكل يخلي اظافرك شكلها حلو

      نورتيني

  11. الموضوع رووووعه
    وانا استفدت كثير
    الله يعطيك العافية ياقمر

    اذا تسمحي لي انقله لأحد المنتديات
    اكون شاكرة لكِ

    اختك pizza

    • انتي عارفة انه عندك ميزة انه اظافرك مربعة، لانه كونها مربعة و صغيرة فا في امل انك مع الاهتمام بيها و قص الجلد اللي في نهاية الظفر ممكن تبان اوسع

      طبعا افضل شكل لظفرك هو المربع عشان يساعد اكتر على انها تبان اوسع
      شوفي تدوينة كيف تقصي ظفرك بشكل مربع و قوليلي رايك
      الالوان الفاتحة و كمان اللون الفوشي اذا اتحط بطريقة مرتبة حيظهر اظافرك بشكل جميل

      اتمنى اكون افدتك
      نورتيني

  12. تسلمي ع الموضوع
    بس حابة اسالك؟؟
    انا اظافيري الليي هيا الابهاموالسبابة والوسطى كلهم نفس الشكل بس الخنصر والبنصر شكل مربع احاول اخليهم بضاوي ما قدرت وانا ابا اصور يدي عشان تشوفين بلييز لان اظافري يفشلوون

    • سوري ابا اعدل الكلمات
      انا اظافيري الليي هيا الابهاموالسبابة والوسطى كلهم نفس الشكل (بيضاوي) بس الخنصر والبنصر
      على شكل مربع وانا احااول اخليهم بيضاوي نفس باقي الاظافر ما عرفت لان شكل الخنصبر والبنصر من تحت مربع والباقي بيضاوي بليز ساعديني عشان اظافري يفشلون

  13. هاااي اشكرك من كل قلبي على هاذي المدونة الرائعة .. انا احب المناكير جدا و لكن في نفس الوقت احاول التقليل منها لاني اخاف تخرب اظافري مع كثر المسح بس انا عندي سؤال بسيط !!
    هل من ال

  14. شكرا ليكي على النصائح الحلوة انا احب الشكل البيضاوي و احسه الانسب ليدي اظافري نحيفة و مداها طويل و كمان شكل الجلد مقوس و اظافري مقوسة من الاساس بس اعملها ترتيب بالمبرد علشن تبين ارتب .. شكرا على نصائحك

    • احم سلاموووو :oops:
      ياخيتووو ممكن اعرف كيف تسوينها عشان تطول :roll:
      والله مرة متعبتني اظافري :???:
      اتمنى تردي علي :arrow:
      ودي

  15. هااااي
    شكراا لكي على الموضوعالرائع :wink:
    لو سمحتي انا احيانا تطلع اظافيري لونها اصفر ليش ايش الحل اذا عندك الحل قوليلي بلييز؟؟
    وانا مره كنت حاطه مناكير كنت اريد ان اشيله وماكان عندي مزيل للمناكير فستخدمت العطر وشلت المناكير بس صارعند سطح الظفر إلي هو مدى الظفر لونه اصفر هل في علاج لهذي المشكلة؟؟
    وأخر شي إذا ماكان عندي مزيل مناكير ايش استخدم لإزالة المناكير :?:
    وشكررررررررا

  16. اآحم اهلن :oops:
    شكرآ على الموضوع العسل زيك :wink:
    بس انا اظافري قصيرة وماتطول :sad:
    وكل مابطولها تنكسر :cry:
    ايش الحل :???:
    اتمنى تساعديني :cry:
    ودي :sad:

  17. لو سمحتي انا اظافري غريبة صراحة ماعمري شفت زيها
    أولا انا نحيفة بس يدي عريضة وفيها طبقات والجلد طالع من فوق الظفر واضافري مو من اي صورة حطيتيها :( عشان كذا هي غريبة والابهام ف يدي اليسار نحيف ومفلطح وعريض مرررره حتى الناس صاروا يتريقوا عليه والله تعقدت تعقدت :’(( وغير اللي ذكرتلك هيا انو اصابعي عريضة وقصيرة مرة وشكل اضافري والاطراف اللي حولينها عاليمين واليسار مو مستقيمة :( مايلة على جمب مرررة ومن كتر مالناس قاعدين يحبطوني اكثر صرت معد اهتم فيهم ابدا *ملاحظة : انا آكل اظافري وهذا الشي من يوم انا صغيرة للان :( واضافري قاسية وماتطول ومن فوق مايلة بشكل يحزن صراحة :”(((( ، طيب ينفع اسوي جراحة تجميل لاصابعي ويدي ؟ -والله الناس معقدتني مرة حتى البنات اللي فالمدرسة يتريقوا عليه- صراحة عجزت القى حل لمشكلتي واتمنى تجاوبي وتفيديني
    وآسفة اذا طولت عليك :”)

  18. انا اظافري مروحه انا ربه منزل بس احاول اهتم باظافري ايش تنصحيني بالنسبه لاظافري واخيرا لقيت لهم اسم شكلهم