أسئلة متكررة

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

س١  اظافري طويله وشويه عريضه , ينفع اقصها اي شكل ؟؟

اذا قصدك مداها طويل و عريضة يسير

الاشكال الافضل لكي هي

البيضاوي

الدائري لانه حيبين اظافرك انحف

و لشرح اوفر شوفي هذه التدوينة

________________

س٢ انا هاوس وايف واظافيري مابتتحمل كتير ع طول بتتكسر خصوصا مع المويه والصابون الكتير

ايش اعمل عشان احافظ عليها ؟؟

اول شي خلي اظافرك قصيرة

حاولي تلبسي قلوفز او جونتي عشان لا تعرضي اياديكي للموية كتير ترا تتضعف الاظافر و تنشف اليد

استخدمي يوميا كريم لليد و للاظافر

في كريم من او بي اي

اسمه

“AVOPLEX”

high intensity hand and nail cream

كمان فازلين مسويين كريم لليد و الاظافر

اتوقع تلاقيه في الصيدليات و السوبر ماركت

ــــــــــــــــــــــــــــــــ

س٣ اذا اشتريت مناكير لون معين و طلع خفيف او شفاف..كيف ممكن اعزز اللون؟

اول شي حاولي تحطي ثلاثة الي اربعة طبقات..اذا برضو ماهو باين بالدرجة اللي تبغيها

حطي كقاعدة اللون الابيض و اكتفي بعدها بطبقتين من اللون اللي تبغيه..هذا في حالة اذا اللون تبغيه يكون  فاقع او واضح

اما اذا تبغي اللون غامق او غامض شوية..حطي كقاعدة لون غامق..اختاري اي لون عندك غوامق كتير..بس ارجح الاسود و الرمادي الغامق اكتر شي

ــــــــــــــــــــــــــــــــــــ

س٤ كيف اقدر اشيل الحناء عن اظافري؟

في طرق ذكروها بنات في مواقع مختلفة بس انا اشوفها خطيرة جدا و النتيجة منها مش أكيدة..فا حلي لهذه المشكلة كالتالي

ممكن انك تقصي اظافرك و كل ما طولت تقصيها لين ما يروح اللون من الظفر

ممكن انك اذا مستعجلة و عندك مناسبة و ما تبغي تروحي و نص ظفرك عليه حناء..يسير حطي عليه لون مناكير

ممكن تجربي هذه الطريقة ” بس انصحك اذا ما طلع من اول  او تاني مرة لا تزودي لانه ظفرك مرة حينعدم و حتتمني لو انك استحملتي لون الحناء و لا انه يتبهدل ظفرك” انك تشيلي الحناء بالاسيتون كانك بتشيلي المناكير عادي

في طريقة تانية بس برضو بحذّر منها نفس التحذير الاول..الطريقة انك تعملي صنفرة لظفرك..بس بليييز لا تطولي الصنفرة..لانه ظفرك حيسير نحيف و شفاف بزيادة و صراحة ما ادري ايش العواقب اللي ممكن تنتج عن ده الشي..فا ممكن تسوي دي الطريقة بس اعملي الصنفرة بشكل خفيف جدا..و اذا سار لون الحناء خفيف و ما راح تمام..لا تزودي الصنفرة وقتها..انتظري اسبوع و بعد كده ارجعي سوي صنفرة و على خفيف مرة

طريقة الصنفرة تقدري تشوفيها في هذا الفيديو

ملاحظة: انا مش متأكده من انه الطرق اللي ذكرتها جابت نتيجة او لا..بس هي طرق معقولة و اتوقع انها تظبط معاكي

ــــــــــــــــــــــــــــــــــــــــــ

هذه الصفحة مخصصة لاسئلتكم

اذا حابين تسألوا ممكن تكتبوا السؤال في كومينت تحت اي موضوع في المدونة او ترسلولي هي على الايميل

alwan.manakeer(at)gmail.com

و انا حرد عليها و احطها في هذه الصفحة

شكراً على تواجدكم في مدونتي اللي بتنوروها دايما