Cracked Nail Polish by H&M

Date: 2012.03.03 | Category: H&M, O.P.I مناكير, OPI | Response: 10

اهلا بالجميع

و أخيرااا…المناكير اللي كنت السنه اللي فاتت ابغى اعرضلكم هو..اخيرا سار متواجد هنا في جدة..بس للاسف مش من او بي اي..من ماركة اتش اند ام

هو مناكير بتأثير التصدع الجميل!

اتش اند ام قريب اللي فتحت قسم ادوات التجميل هنا في جدة.. و ده شي بسطني جدا لانه من جد مناكيرهم رائع، و هذا اللي حتكلم عنه اليوم من جد مناكير مجنون!

اسمه

Cracked nail polish

يجي في العلبة اللي مبينة في الصورة..يعني مالو رقم

ايش رأيكم نشوف الفيديو القصير هذا عن كيفية استخدامه و نرجع نتكلم شوية عنه

بدايةً…خليني افصل شوية اللي شرحته في الفيديو عن كيفية الاستخدام

طبعا هي سهلة جدا و هي في النقاط التالية:

١- اولا احلى شي في المناكير ده انك مو لازم تلتزمي بحدود اللون الفوشي او الظفر بس طبعا حلو لو حطيتي اللون قريب من حدود اللون الفوشي عشان يبان بروفيشنال اكتر

٢- اذا لاحظتوا اول تلاته اظافر كان التأثير فيها مو قوي خطوط التصدع نحيفة و ماهي حلوة لكن الظفر الرابع خطوط التصدع عريضة نوعا ما و واضحة و تحسي الشكل مرتب..مصدع بس مرتب..و عشان تحصلي علي الشكل المرتب ده ملي الفرشة مزبوط باللون ..بس مو مرة لدرجة انه يزيد اللون ع الظفر و يروح ع الاطراف..و بعد كده ابدأي حطي اللون و لا ترجعي علي منطقة حطيتي عليها قبل..عشان لا يتلخبط شكل التصدع

٣- اكتر شي ممتع في ده المناكير انه التأثير يبان في ثواني..و اتوقع انه بان في الفيديو..انا سرعته شويه عشان لا تملوا..بس هو في ثواني يظهر التأثير…من جد اللي اخترعوا واحد مرة هابق..هيهيهي

٤- طبيعي انه التأثير حيختلف من ظفر للتاني..ده شي طبيعي و ده احلى شي فيه..بعض الاظافر يظهر التاثير فيها بالعرض و بعضها زي اللي ظهر معايا كان بالطول

اخيرا..وضع اللون الشفاف للحفاظ على التأثير و اللون اللي تحته

اذا منتي حابه انه يكون بلمعة..ممكن تستخدمي مناكير شفاف مطفي من او بي اي، اتكلمت عنه في هذه التدوينة

و هذه صورتين لليدين، اذا حابين تشوفوا التأثير بدقة اكتر

انا استمتعت جدا في هذا الفيديو..اتمنى انتوا كمان يكون عجبكم

اللون الفوشي اللي علي ظفري قريبا حكتب عنه تدوينة ان شا الله

اتمنى محلات نزيه تبدأ تبيع البلاك شاتر اللي له نفس تأثير هذا المناكير بالزبط، بس حاليا هذا المناكير اللي تقدروا تحصلوا عليه في جدة

ـــــــــــــــــــــــــــــــــ

محلات اتش اند ام في جدة

مجمع العرب

هو له فروع تانية بس لسه مش متاكده اذا فيها قسم ادوات التجميل..اللي متاكده منه اكتر هو مجمع العرب

اتش اند ام دبي

دبي مول

سعرها، للاسف انا اشتريته من دبي و ناسيه سعره، لكن ان شا الله قريبا حقولكم سعره …سامحوني

اتمنى تكون تدوينة خفيفة و عجبتكم يا رب

Baby Blue – INGLOT!

Date: 2012.02.27 | Category: INGLOT | Response: 4

أهلا بالجميع

اليوم جايبتلكم لون عاجبني من زمان..و حبيت اكتب عنه اليوم

الا و هو البيبي بلو..او الازرق الفاتح

انجلوت معودتنا على مناكير رائع القوام و الملمس..فحبيت اختار اللون اللي عاجبني من انجلوت تحديدا

رقمه:970

بدايةً اللون ده ينفع يتحط في الصيف..في الفترة الصباحية تحديدا..بس طبعا مش وحش في الليل اذا رايحة عند صاحباتك عادي او خارجة بس مش سهرة طبعا!

هنا حطيت طبقتين كان خفيف و لونه شبه باهت..صراحة ما عجبني

اما هنا..زودت طبقة تالتة..فطلع بنتيجة ارضتني جدا…مرة عاجبني اللون ده…رايق و فرايحي في نفس الوقت

و الجدير بالذكر اني اتفاجأت بانه انجلوت سار عندهم المناكير حق النيل ارت..او فن الرسم ع الاظافر…اذا تفتكروا هذا المناكير اللي فرشته نحيفة جدا عشان تقدري ترسمي بيها ع الظفر

بالاضافة الى الوان رائعة جدا من المناكير العادي..من درجات البرتقالي..الى درجات الموف….الوان مبهجة جدا

سعر هذا المناكير ..همممم تصدقوا ماني فاكرة..هههه هو يا 35 او 45 ريال سعودي

سعر مناكير النيل ارت ..تخيلوا هادا مفتكرة سعرو..هههه 60 ريال سعودي

فروع انجلوت في جدة…

رد سي مول

الاندلس..قريبا

فروع انجلوت في دبي

دبي مول

ـــــــــــــــــــــــــــــ

شكرا ليكم على كل الحب و الدعم لهذه المدونة

اتمنى تكون عجبتكم التدوينة

Deborah Milano مناكير

Date: 2012.01.22 | Category: Deborah Milano | Response: 10

 أهلا بالجميع

اليوم جايبتلكم مناكير

Deborah Milano

نقيت لونين فقط لهذه التدوينة باذن الله

اللون  الاول هو

Deborah Milano “7 Days Long”

لون عودي “نبيتي” جميل جدا، هذه الفترة مدري اشبي ع اللون ده بالزات

اللون رقمه: 787

و حتلاقوه على راس غطاء القارورة

الفرشة كانت مريحة في الاستخدام، بس المشكلة في قوام اللون…لاني لما حطيت اول طبقة، حتة كانت غامقة و حتت تانية فاتحة، فا اضطريت انه احط تلاته طبقات زي منتو شايفين في الصورة

هو اهم ما يميز هذا المناكير هو انه يستمر لمده 7 ايام بدون تشقق، بس انا ما جربته لهذه المده، حيكون فيه تحديث للتدوينة ان شا الله لما اجربه

اللون التاني اللي معانا هو

Deborah Milano “Shine Tech”

لون موف علي لافيندر…بلمعة موف غامقة نسبيا، لون رايق و حلو

اللون رقمه: 59

فرشته اعرض من اللون الاول بشي بسيط بالاضافة الي سهولة استخدامها

في الصورة اللي فوق مو باينه مرة اللمعة فحبيت اوضحلكم هي في الصورة التاليه..

Deborah Milano

تلاقوها في سنتربوينت  - ستي بلازا سابقا

او اي ستاند يبيع منتجات هذه الماركة

اتمنى المواضيع الاخيرة عاجبتكم، احب اسمع آراءكم هنا او في تويتر

BIGUINE مناكير

Date: 2012.01.15 | Category: BIGUINE, Zohoor Alreef | Response: 3

الصورة مأخوذة من هنا

أهلا بالجميع

BIGUINE

منتجات تجميل من باريس…اهتمت بالوان المناكير ..عندها الوان متعددة

اخترتلكم اليوم لونين فقط منها

يتميز هذا المناكير بهيئته الانسيابية، فرشته معقولة و سهلة الاستخدام و اللون غني جدا

اللون الاول معانا هو

First Kiss

لون بمبي مشع، ينفع لطلعات في النهار و كمان للسهرات في الليل

هنا حطيت طبقتين فقط..فباين جزء من الاظافر

لكن اذا ملاحظين بان شكله ارتب اكتر مع تلاته طبقات

اللون التاني

هو اللون الاحمر

Rouge Couture

  لون جذاب و ملفت جدا و قوامه تقيل و متماسك، استمتعت جدا و انا احطه

سعر هذا المناكير 36 ريال سعودي

منتجات “بيجوين” او “بجيان” متواجدة في محلات زهور الريف

فروع زهور الريف في جدة

سنترال بارك – امام الدانوب

سوق حراء – بوابة ٦ او ٧ – امام ذي بودي شوب

ريد سي مول

موقع زهور الريف

اتمنى الالوان عجبتكم