مناكير الكاڤيار|Caviar Mani

أهلا بالجميع،

  أول مرة أجرب مناكير الكاڤيار، كنت أحسب طريقته صعبة بس طلعت سهلة جدا و اذا حتعملي ظفر واحد فماتاخد وقت

بداية خلينا نشوف الفيديو و نرجعلكم

Caviar Mani from Sarah A on Vimeo.

أنا نقيت اني اعمل ظفر واحد، لانه

اذا سويت كل اليد فحيسير المنظر بزيادة -

 حياخد وقت اطول بالاضافة الى ان الظفر يحتاج عناية و صبر عبال ما تثبت حبوب الكاڤيار -

لشكل افضل لهذا المناكير

في الظفر اللي حتحطي عليه الكاڤيار لا تحطي لون مناكير مختلف عن لون حبوب الكاڤيار، لان المنظر ما حيكون حلو ابدا و حيبان تباعد بعض الحبوب عن بعضها

فا لشكل افضل التزمي باللون اللي محطوط في العلبة ولا تغيري ابدا الا اذا كانت حبوب الكاڤيار شفافة، عاد المنظر حيطلع احلى و يبان كانه بيلمع، غير كده لا تجازفي و تحطي لون مغاير لانه اول حبة حتطيح من الظفر حتشوهلك شكل الظفر كله

اول ما تكبي الحبوب ع الظفر زي مو مبين في الفيديو اضغطي باصباعك علي الظفر بشويش عشان تشيلي الحبوب الزايدة، بعد كده انتظري لمدة ١٠ – ١٥ دقيقة بس هنا من جد لا تسوي اي شي بيدك، لا تجافزي و تسوي شي

حاولي قد ما تقدري انك تحافظي عليه،

 بالنسبة لوضع المناكير الشفاف على أعلى طرف الظفر لحمايته، انصح بانك لا تتحمسي زي ما انا سويت و اكتفي بمرة واحدة بس و بشويش ما يكون بذمة مرة

هنا في الصورة، حاولت تغيير لون المناكير العادي، حبيته اكتر من انه كله يكون اخضر، ياريت اعرف آرائكم ايت فيهم عجبكم اكتر؟

لون الحبوب و المحافظة على شكل هذا المناكير

لازم اقول انه لون حبوب الكاڤيار لازم حيتغير حتى لو بدرجة بسيطة -

اذا ما حطيتيه بشكل مزبوط في احتمال الشكل يخرب بعد يوم واحد، في مدونة اجنبية حطته  جلس معاها ٣ ايام -

 نهايةً، من وجهه نظري المناكير هذا ينفع لحفلة او مناسبة لانه ما بيفضل لفترة طويلة محافظ على شكله

ــــــــــــــــــــــــــــ

 هذا المناكير متواجد عند واحدة بتبيعه

العلبة ب ٣٥ ريال

تقتدروا تتواصلوا معاها عن طريق حسابها على فيس بوك

و احب اشكرها لانها اعطتني هذا المناكير عشان اكتب عنه في المدونة

Essie مناكير

أهلا بالجميع

ورجعنا…

انا عارفة..سارلي فترة طويلة جدا ما كتبت حاجة وده الشي كان بسبب انشغالي، لكن من كتر ما وصلتني ايميلات ولازالت و كمان تويتات، قررت اني اكتب مواضيع كل ما لقيت حاجة عجبتني و حبيت اعرضلكم هي

وحشتني المدونة جدا و وحشتوني و تعليقاتكم الجميلة كمان

نبدأ بمناكير إسي

يللا

لونين حلوين من إسي معانا في هذه التدوينة..

بداية احب اقول انه ماركة إسي من الماركات المعروفة بجودتها والوانها الجميلة

اول لون حختار اتكلم عنه هو اللون الاخضر

اسمه

School of Hard Rocks

حتلاحظوا اظافري قصيرة، وهذا لاني كنت بأقصها تقريبا باستمرار لاني ماكنت اعتني بيها الاعتناء المنتظم اللي كنت مستمرة عليه ايام اول، ان شا الله يتغير الوضع الان

نرجع للون

اللون جميل جدا و زي ما سبق وقلت انه من وجهة نظري اي لون غامق ماعدا العودي حلو لو حطيتيه واظافرك قصيرة و علي شكل مربع، حيكون شكلها احلى و ارتب حتى لو مدى ظفرك قصير

اللون التاني هو

Miss Fancy Pants

لون هاءئ و مناسب جدا لكل مناسبة او حتى لو رايحة البحر، لونه اللحمى على بيج بيعطيكي مجال تلبسيه مع اي لبس

وطبعا حيطلع رهيب اذا كنتي متشمسة وحطيتيه

عموما وضع مناكير إسي مريح نوعا ما..مع انه هذا اللون كان شوية لزج

ـــــــــــــــــــــــــــــــــــ

مناكير إسي لكل اللي بيسألوا

متواجد في صالون منة سنتر

بـ٧٠ ريال

Cracked Nail Polish by H&M

 

اهلا بالجميع

و أخيرااا…المناكير اللي كنت السنه اللي فاتت ابغى اعرضلكم هو..اخيرا سار متواجد هنا في جدة..بس للاسف مش من او بي اي..من ماركة اتش اند ام

هو مناكير بتأثير التصدع الجميل!

اتش اند ام قريب اللي فتحت قسم ادوات التجميل هنا في جدة.. و ده شي بسطني جدا لانه من جد مناكيرهم رائع، و هذا اللي حتكلم عنه اليوم من جد مناكير مجنون!

اسمه

Cracked nail polish

يجي في العلبة اللي مبينة في الصورة..يعني مالو رقم

ايش رأيكم نشوف الفيديو القصير هذا عن كيفية استخدامه و نرجع نتكلم شوية عنه :)

بدايةً…خليني افصل شوية اللي شرحته في الفيديو عن كيفية الاستخدام

طبعا هي سهلة جدا و هي في النقاط التالية:

١- اولا احلى شي في المناكير ده انك مو لازم تلتزمي بحدود اللون الفوشي او الظفر بس طبعا حلو لو حطيتي اللون قريب من حدود اللون الفوشي عشان يبان بروفيشنال اكتر

٢- اذا لاحظتوا اول تلاته اظافر كان التأثير فيها مو قوي خطوط التصدع نحيفة و ماهي حلوة لكن الظفر الرابع خطوط التصدع عريضة نوعا ما و واضحة و تحسي الشكل مرتب..مصدع بس مرتب..و عشان تحصلي علي الشكل المرتب ده ملي الفرشة مزبوط باللون ..بس مو مرة لدرجة انه يزيد اللون ع الظفر و يروح ع الاطراف..و بعد كده ابدأي حطي اللون و لا ترجعي علي منطقة حطيتي عليها قبل..عشان لا يتلخبط شكل التصدع

٣- اكتر شي ممتع في ده المناكير انه التأثير يبان في ثواني..و اتوقع انه بان في الفيديو..انا سرعته شويه عشان لا تملوا..بس هو في ثواني يظهر التأثير…من جد اللي اخترعوا واحد مرة هابق..هيهيهي

٤- طبيعي انه التأثير حيختلف من ظفر للتاني..ده شي طبيعي و ده احلى شي فيه..بعض الاظافر يظهر التاثير فيها بالعرض و بعضها زي اللي ظهر معايا كان بالطول

اخيرا..وضع اللون الشفاف للحفاظ على التأثير و اللون اللي تحته

اذا منتي حابه انه يكون بلمعة..ممكن تستخدمي مناكير شفاف مطفي من او بي اي، اتكلمت عنه في هذه التدوينة

و هذه صورتين لليدين، اذا حابين تشوفوا التأثير بدقة اكتر

انا استمتعت جدا في هذا الفيديو..اتمنى انتوا كمان يكون عجبكم

اللون الفوشي اللي علي ظفري قريبا حكتب عنه تدوينة ان شا الله

اتمنى محلات نزيه تبدأ تبيع البلاك شاتر اللي له نفس تأثير هذا المناكير بالزبط، بس حاليا هذا المناكير اللي تقدروا تحصلوا عليه في جدة

ـــــــــــــــــــــــــــــــــ

محلات اتش اند ام في جدة

مجمع العرب

هو له فروع تانية بس لسه مش متاكده اذا فيها قسم ادوات التجميل..اللي متاكده منه اكتر هو مجمع العرب

اتش اند ام دبي

دبي مول

سعرها، للاسف انا اشتريته من دبي و ناسيه سعره، لكن ان شا الله قريبا حقولكم سعره …سامحوني

اتمنى تكون تدوينة خفيفة و عجبتكم يا رب :)

Baby Blue – INGLOT!

أهلا بالجميع

اليوم جايبتلكم لون عاجبني من زمان..و حبيت اكتب عنه اليوم

الا و هو البيبي بلو..او الازرق الفاتح

انجلوت معودتنا على مناكير رائع القوام و الملمس..فحبيت اختار اللون اللي عاجبني من انجلوت تحديدا

رقمه:970

بدايةً اللون ده ينفع يتحط في الصيف..في الفترة الصباحية تحديدا..بس طبعا مش وحش في الليل اذا رايحة عند صاحباتك عادي او خارجة بس مش سهرة طبعا!

هنا حطيت طبقتين كان خفيف و لونه شبه باهت..صراحة ما عجبني

اما هنا..زودت طبقة تالتة..فطلع بنتيجة ارضتني جدا…مرة عاجبني اللون ده…رايق و فرايحي في نفس الوقت :)

و الجدير بالذكر اني اتفاجأت بانه انجلوت سار عندهم المناكير حق النيل ارت..او فن الرسم ع الاظافر…اذا تفتكروا هذا المناكير اللي فرشته نحيفة جدا عشان تقدري ترسمي بيها ع الظفر

بالاضافة الى الوان رائعة جدا من المناكير العادي..من درجات البرتقالي..الى درجات الموف….الوان مبهجة جدا

سعر هذا المناكير ..همممم تصدقوا ماني فاكرة..هههه هو يا 35 او 45 ريال سعودي

سعر مناكير النيل ارت ..تخيلوا هادا مفتكرة سعرو..هههه 60 ريال سعودي

فروع انجلوت في جدة…

رد سي مول

تم افتتاح الفرع اللي في الاندلس مول

فروع انجلوت في دبي

دبي مول

ـــــــــــــــــــــــــــــ

شكرا ليكم على كل الحب و الدعم لهذه المدونة

اتمنى تكون عجبتكم التدوينة